la mapkun jizon

By tijlan

la mapkun jizon
puzubu'uku pindi je xendo xabju fa lo laldo nanmu goi ko'a e lo laldo ninmu goi ko'e

ca lo fanmo djedi pe lo nanca ko'a joi ko'e ba'o zbasu lo konju mapku - aidai ba bevri gi'e vecnu vau ri bu'u lo tcadu ja'e lo nu ka'e te vecnu lo rismnmotci pe lo cnino nanca salci - { le mapku cu 5 mei uo - ju'o ba te vecnu kakne } se cusku ko'a - ko'e spuda fi { a'idai.i'i - le cabna nicte zo'u la'a ba snime fasnu - a'edai.e'o } - ko'a fi'o se jgari le 5 mapku cu fa'a cliva

baziku co'a carvi fa loi snime - ri carmi zenba semu'i lo nu ko'a sutra klama ve le klaji - te'e le nurma fanmo cu za'a cnici sanli fa 6 larcnjizo - rotsu cpana ro lo ri stedu je janco fa loi snime - ko'a noi ba'o sanji la'e di'u cu co'u se frili lo nu secau pa'o klama - { doi io jizon - fau lo nu snime carvi cu oiro'odai lenku - e'u do snura sepi'o lo [at least] ti mapku } - ko'a gasnu lo nu lo larcnjizo cu dasni lo mapku - ku'i ranxi fa lo nu ge le larcnjizo cu 6 mei gi le mapku cu 5 mei - semu'ibo ko'a to'e dasni benji lo vo'a mapku tu'a le ro moi larcnjizo

ko'a co'i xruti klama le zdani - ko'e se spaji gi'e cusku { uesai sutra - le mapku ba'o mo } - ko'a ciksi tu'a le larcnjizo - ko'e cisma spuda fi { i'e do ba'o xamgu gasnu - oinai rismnmotci claxu }

ca lo bancu be le bi'unai nicte cu co'a tirna lo cizra se sanga - { lo zdani pe le laldo nanmu vi ma } - { co'i bevri lo ve cnemu } - { lo zdani pe le laldo nanmu vi ma } - { co'i bevri lo ve cnemu } - le se sanga cu zenba lo ka ce'u jibni - za'adai uo ca'u le zdani - ce'obo sa'ei dzucin sance fi'o se simlu lo ka punji - babo smaji - ko'a co'i lo mu'e xanka ke kalri gasnu tu'a lo foldi vorme cu viska lo trixe be le larcnjizo noi ro ke'a dasni le mapku noi ko'a pu dunda - je ca'u le zdani cu mutce derxi loi rismnmotci a loi cidja vu'o pe lo cnino nanca salci

fa'o